Inclytus patriarcha Joseph

Aus kathPedia
Zur Navigation springenZur Suche springen
Decretum
Inclytus patriarcha Joseph

Sacra Rituum Congregatio
a papa Pii IX.
10 septembris 1847

Das Patronatsfest des heiligen Josef wird vom Klerus der Stadt Rom auf die ganze Kirche

Inclytus Patriarcha Joseph, quem Omnipotens Pater singularibus gratiis auxit, ac charismatibus coelestibus abunde cumulavit, ut unigeniti Filii sui putativus pater esset ac verus sponsus Reginae mundi et Dominae angelorum, tam sublimis electionis partes omnes, muniaque adeo perfecte explevit, ut boni fidelisque servi encomium meruerit et praemia.

Etenim memor semper praecellentis dignitatis suae ac sanctitatis nobilium officiorum, que is a Divina Sapientia praeficiebatur, ipsius Dei consiliis et voluntati alacritate propemodum inenearrabili in omnibus indesinenter paruit, placensque Deo factus est dilectus, donec gratia et honore coronatus in coelis, novum susciperet officium, nimirum ut copiosis meritis et orationis suffragio miserrimae subveniret hominum conditioni atque validissima intercessione quae possibilitas humana obtinere nequit mundo impetraret.

Hinc passim misericors veneratur ad Deum mediator efficaxque patronus ejusque Patrocinii festum cum officio ac missa longe lateque instituitur dominica tertia quae a paschalibus gaudiis occurrit. Verum quod unum adhuc exoptandum superaret, nimirum ut officium Patrocinii Sancti Joseph de praecepto ad universalem extenderetur Eccclesiam, id Eminentissimus et Reverendissimus Dominus cardinalis Constantinus Patrici a Sanctissimo Domino nostro Pio papa IX humillimis precibus, proprio et aliorum Sanctae Romanae Ecclesiae Cardinalium, ac quamplurium etiam exterorum fidelium nomine porrectis, enixe imploravit.

Quas quidem preces apprime conformes singulari pietati suae erga Sanctum Josephum apostolica benignitate excipiens, Sanctissimus idem Dominus, referente me subscripto Sacrorum Rituum Congregationis Secretario, benigne in omnibus annuit praecepitque ut deinceps ab utroque clero Urbis et Orbis sub ritu duplicis secundae classis persolvatur officium proprium cum missa Patrocinii Sancti Joseph dominica tertia post Pascha, qua impedita alio officio potioris ritus vel majoris dignitatis, indulsit ut officium Patrocinii Sancti Joseph transferatur ad primam diem liberam juxta rubricas. Contrariis non obstantibus quibuscumque.

Die 10 septembris 1847, Sacra Rituum Congregatio.

Weblinks